ციფრული მმართველობის სააგენტოს წარმომადგენლებმა კამბოჯის ტელეკომუნიკაციების მინისტრს, ჩეა ვანდეტს სააგენტოს მანდატი, ფუნქციები და დაგეგმილი პრიორიტეტები გააცნეს. საუბარი შეეხო კიბერუსაფრთხოებისა და ინფორმაციული უსაფრთხოების პოლიტიკას, ინციდენტების რეაგირებისა და ცნობიერების ამაღლების მიმართულებით სააგენტოს როლსა და ფუნქციებს; ციფრული მმართველობის განვითარების კუთხით დანერგილ ელექტრონულ სერვისებს, სახელმწიფო უწყებებს შორის მონაცემთა გაცვლის ერთიან სისტემას, ციფრული მმართველობის განვითარების სტრატეგიასა და სამოქმედო გეგმით გათვალისწინებულ ღონისძიებებს.კამბოჯის დელეგაციის განსაკუთრებული ინტერესი გამოიწვია ელექტრონული სერვისების ერთიანმა პორტალმა - my.gov.ge, სადაც მოქალაქეებს 400-მდე სერვისის მიღება დისტანციურად შეუძლიათ. ვებგვერდი უკვე 10 წელზე მეტია სახელმწიფო სერვისების ელექტრონულ ხელმისაწვდომობას სტაბილურად უზრუნველყოფს. სამუშაო შეხვედრაში ასევე მონაწილეობდნენ კამბოჯის დელეგაციის წევრები, იუსტიციის სამინისტროს სახელმწიფო სერვისების განვითარების სააგენტოს, იუსტიციის სახლის და საჯარო რეესტრის ეროვნული სააგენტოს წარმომადგენლები. ვიზიტის ფარგლებში, კამბოჯის დელეგაციისთვის თბილისის იუსტიციის სახლში საინფორმაციო ტური გაიმართა.

ინფორმაციული უსაფრთხოების შესახებ სასწავლო კურსის მიზანია „ინფორმაციული უსაფრთხოების შესახებ“ საქართველოს კანონისა და კანონქვემდებარე აქტების მოთხოვნების აღსრულების ხელშეწყობა და ამავდროულად, ინფორმაციული უსაფრთხოების მენეჯერების მომზადება ან გადამზადება.ტრენინგზე ინფორმაციული უსაფრთხოების მართვის სისტემის (ISMS) დანერგვისა და მხარდაჭერის პრინციპები და სისტემასთან დაკავშირებული საერთაშორისო სტანდარტები განიხილეს.მონაწილეები გაეცნენ „ინფორმაციული უსაფრთხოების შესახებ“ საქართველოს კანონისა და შესაბამისი კანონქვემდებარე ნორმატიული აქტების მოთხოვნებს, რომელთა შესრულებაც სავალდებულოა კრიტიკული ინფორმაციული სისტემის სუბიექტებისთვის, ისევე, როგორც იმ ორგანიზაციებისთვის, რომლებიც კანონმდებლობით დადგენილ ნორმებთან შესაბამისობის უზრუნველყოფას ისახავენ მიზნად.ტრენინგი ინფორმაციული უსაფრთხოების დეპარტამენტმა ჩაატარა, რომელსაც ესწრებოდნენ პირველი და მესამე კატეგორიის კრიტიკული ინფორმაციული სისტემის სუბიექტების წარმომადგენლები. დასკვნით დღეს მონაწილეებმა გაიარეს ტესტირება, რომლის წარმატებით ჩაბარების შემთხვევაში, ისინი ინფორმაციული უსაფრთხოების მენეჯერის სერტიფიკატს მიიღებენ.

ციფრული მმართველობის სააგენტოს პროდუქტებსა და სერვისებს ყაზახეთის ქალაქ ყარაგანდას ეროვნული კვლევითი უნივერსიტეტის სამეცნიერო-კვლევითი ჯგუფის წარმომადგენლები გაეცნენ. მხარეებმა მიმოიხილეს ყაზახეთისა და საქართველოს ციფრული სამართალწარმოების სექტორი. კერძოდ კი, სისხლის სამართლის საქმეების მიმართულებით მოქმედი ციფრული მექანიზმები. სტუმრების განსაკუთრებული დაინტერესება გამოიწვია სააგენტოს მიერ შექმნილმა სისხლის სამართლის საქმისწარმოების მართვის ელექტრონულმა სისტემამ, რომელიც გამომძიებლებსა და პროკურორებს საშუალებას აძლევს სისხლის სამართლის საქმეებზე საგამოძიებო და საპროცესო მოქმედებები ელექტრონულად განახორციელონ. პროგრამა ხელს უწყობს საპროკურორო საქმიანობისა და გამოძიების საპროცესო ხელმძღვანელობის ეფექტიან უზრუნველყოფას. სამუშაო შეხვედრაზე ასევე განიხილეს ყაზახეთის სახელმწიფო გრანტით შექმნილი ხელოვნური ინტელექტის სისტემის ორი მაგალითი, რომელთა მეშვეობითაც ხორციელდება სასამართლო გადაწყვეტილებებისა და საჯარო მმართველობის პროცესში შექმნილი დოკუმენტების ანალიზი. სისტემა ხელს უწყობს სამართალწარმოების პროცესის ეფექტიანობას მოსამართლეების, პროკურორების, გამომძიებლების და ადვოკატების დროითი რესურსის დაზოგვითა და ადამიანური შეცდომების შემცირების გზით. მხარეები თანამშრომლობის გაღრმავებისა და საინტერესო პრაქტიკების გაზიარების მიზნით სამუშაო შეხვედრების გაგრძელებაზე შეთანხმდნენ.